మధ్యప్రదేశ్లోని షియోపూర్ జిల్లాలో అక్రమ ఇసుక రవాణాను అడ్డుకునేందుకు వెళ్లిన అటవీశాఖ అధికారుల బృందంపై ఇసుక మాఫియా దాడికి పాల్పడింది. ఈ ఘటనలో ఇద్దరు సిబ్బంది గాయపడ్డారు. దుండగులు స్వాధీనం చేసుకున్న ట్రాక్టర్ను కూడా బలవంతంగా తీసుకెళ్లారు.
చంబల్ నది నుంచి అక్రమంగా ఇసుక తరలిస్తున్న ట్రాక్టర్ ట్రాలీని అధికారులు స్వాధీనం చేసుకుని తీసుకెళ్తుండగా, మూడు నాలుగు మోటార్సైకిళ్లపై వచ్చిన ఆరుగురి నుంచి ఏడుగురు వ్యక్తులు వారిని అడ్డుకున్నారు. కర్రలు, రాళ్లతో దాడి చేయడంతో ఇద్దరు అటవీశాఖ సిబ్బంది గాయపడ్డారు. ఈ క్రమంలో స్వాధీనం చేసుకున్న ట్రాక్టర్ను కూడా దుండగులు బలవంతంగా తీసుకెళ్లారు. మరో ట్రాక్టర్తో అధికారుల వాహనాన్ని అడ్డుకునేందుకు ప్రయత్నించారు. గాయపడిన సిబ్బందిని ఆసుపత్రికి తరలించి చికిత్స అందిస్తున్నారు. ఘటనపై పోలీసులు కేసు నమోదు చేసుకుని దర్యాప్తు చేపట్టారు. కొందరు నిందితులను అదుపులోకి తీసుకోగా, మిగిలిన వారి కోసం గాలిస్తున్నారు. అక్రమ ఇసుక రవాణాను అరికట్టేందుకు అధికారులు చర్యలు ముమ్మరం చేశారు.






