బిగ్ బజార్ అధినేత కిషోర్ బియానీపై సీబీఐ కేసు: రూ.904 కోట్ల బ్యాంకు మోసం ఆరోపణలు

స్టేట్ బ్యాంక్ ఆఫ్ ఇండియా (ఎస్బీఐ) ముంబైలోని స్ట్రెస్డ్ అసెట్స్ మేనేజ్మెంట్ బ్రాంచ్ ఇచ్చిన ఫిర్యాదు ఆధారంగా సీబీఐ ఎఫ్ఐఆర్ నమోదు చేసింది. ఈ కేసులో కిషోర్ బియానీ, ఆయన సోదరుడు రాకేష్ బియానీతో పాటు గుర్తుతెలియని ప్రభుత్వ అధికారులు, ఇతర వ్యక్తులను కూడా నిందితులుగా పేర్కొన్నారు.

ఎస్బీఐ ఫిర్యాదు ప్రకారం.. ఫ్యూచర్ రిటైల్ సంస్థ ఎస్బీఐతో పాటు తొమ్మిది బ్యాంకుల కన్సార్టియం నుంచి వర్కింగ్ క్యాపిటల్, టర్మ్ లోన్లు, లెటర్ ఆఫ్ క్రెడిట్ రూపంలో రుణ సదుపాయాలు పొందింది. అయితే మంజూరైన రుణాలను నిర్దేశించిన వ్యాపార అవసరాలకు వినియోగించకుండా అనుబంధ సంస్థలు, సంబంధిత కంపెనీల ద్వారా ఇతర మార్గాలకు మళ్లించినట్లు ఆరోపణలు ఉన్నాయి.

ఈ వ్యవహారంలో నిధుల మళ్లింపు, కుట్ర, మోసం, ఆర్థిక రికార్డులలో అవకతవకలు జరిగాయా అనే కోణాల్లో దర్యాప్తు కొనసాగుతోంది. కేసు నమోదు అనంతరం ముంబైలో కిషోర్ బియానీ, రాకేష్ బియానీకి సంబంధించిన పలు ప్రాంతాల్లో సీబీఐ అధికారులు సోదాలు నిర్వహించారు. ఈ సందర్భంగా దర్యాప్తుకు ఉపయోగపడే కీలక పత్రాలను స్వాధీనం చేసుకున్నట్లు అధికారులు వెల్లడించారు.

ఫ్యూచర్ రిటైల్ సంస్థ గతంలో బిగ్ బజార్, ఫుడ్హాల్, ఫ్యాషన్ ఎట్ బిగ్ బజార్ వంటి రిటైల్ బ్రాండ్లతో దేశవ్యాప్తంగా గుర్తింపు పొందింది. అయితే ఆర్థిక సంక్షోభం, రుణభారంతో సంస్థ తీవ్ర ఇబ్బందుల్లోకి వెళ్లింది. 2024లో ఎన్సీఎల్టీ ముంబై బెంచ్ సంస్థను లిక్విడేషన్ ప్రక్రియలోకి తీసుకెళ్లాలని ఆదేశించింది. ప్రస్తుతం సీబీఐ దర్యాప్తు కొనసాగుతోంది.

రుణ నిధులు చివరకు ఎక్కడికి మళ్లించబడ్డాయి ఈ వ్యవహారంలో ఇతర వ్యక్తుల పాత్ర ఎంత అనే అంశాలను అధికారులు పరిశీలిస్తున్నారు. ఇవన్నీ దర్యాప్తు సంస్థ నమోదు చేసిన ఆరోపణలు మాత్రమేనని, న్యాయస్థానంలో నేరం నిరూపితమైనట్లు కాదని గమనికలో స్పష్టం చేశారు.

బిగ్ బజార్ రిటైల్ సామ్రాజ్యాన్ని విస్తరించిన ఫ్యూచర్ గ్రూప్ వ్యవస్థాపకుడు కిషోర్ బియానీ, ఆయన సోదరుడు రాకేష్ బియానీలపై రూ.904.32 కోట్ల బ్యాంకు మోసం ఆరోపణలతో సీబీఐ కేసు నమోదు చేసింది. స్టేట్ బ్యాంక్ ఆఫ్ ఇండియా (ఎస్బీఐ) ఫిర్యాదు మేరకు ఈ కేసు నమోదైంది. ముంబైలో సీబీఐ అధికారులు సోదాలు నిర్వహించి కీలక పత్రాలను స్వాధీనం చేసుకున్నారు.