మామిడిగట్టులో ఘనంగా దీపావళి వేడుకలు. సర్పంచ్ దంపతుల ఆధ్వర్యంలో సంబరాలు.

మందమర్రి మండలంలోని మామిడిగట్టు గ్రామంలో దీపావళి పండుగ వేడుకలు వైభవంగా నిర్వహించారు. గ్రామ సర్పంచ్ సుంకరి దివ్య, సతీష్ దంపతుల ఆధ్వర్యంలో దుర్గం జ్యోతి ఇందిరమ్మ ఇంటి ప్రాంగణంలో దీపావళి సంబరాలు ఘనంగా జరిగాయి. ఈ సందర్భంగా సర్పంచ్ తో పాటు గ్రామ పెద్దలు, మహిళలు, యువకులు కలిసి దీపాలు వెలిగించి, మిఠాయిలు పంచుకుంటూ పండుగ ఆనందాన్ని పంచుకున్నారు. గ్రామంలోని ప్రతి ఇల్లు సుఖసంతోషాలతో, ఆయురారోగ్యాలతో, దీపాల వెలుగులతో నిండాలని సర్పంచ్ దివ్య ఈ సందర్భంగా ఆకాంక్షించారు. గ్రామ ప్రజలందరూ ఐకమత్యంతో పండుగలను ఆనందంగా జరుపుకోవడం సంతోషకరమని ఆమె పేర్కొన్నారు. ఈ కార్యక్రమంలో ప్రత్యేక అధికారి ఎం.డి. ఇసాక్, గ్రామ పంచాయతీ కార్యదర్శి పల్లెబోయిన సంధ్యారాణి, గ్రామ ఉపసర్పంచ్, వార్డు సభ్యులు, మాజీ ఎంపిటిసి,కాంగ్రెస్ నాయకులు, గ్రామస్తులు తదితరులు పాల్గొన్నారు.